ចំណេះដឹងធំៗទាំងពីរដែលមនុស្សគ្រប់គ្នាគួររៀន

 

ចំណេះដឹងធំៗទាំងពីរដែលមនុស្សគ្រប់គ្នាគួររៀន

នៅក្នុងពិភពលោកយើងនេះគឺពោរពេញទៅដោយចំណេះដឹង តែយើងម្នាក់មិនអាចរៀនចេះគ្រប់ចំណេះដឹងទាំងនោះឡើយ មិនត្រឹមតែប៉ុណ្ណោះទេ យើងក៏គ្មានអាយុវែងឬពេលវេលាវែងសម្រាប់រៀនគ្រប់ចំណេះដឹងទាំងអស់ដែរ។ តែយើងអាចធ្វើការជ្រើសរើសចំណេះដឹងពិត ដែលចាំបាច់សម្រាប់ជីវិតរបស់យើងម្នាក់ៗបាន។

ដោយសារតែការចេះដឹងនេះហើយដែលជួយជំរុញមនុស្សឲ្យមានលក្ខណះខុសគ្នា ឬដូចគ្នានោះ។

មុននឹងខ្ញុំធ្វើការបង្ហាញពីចំណេះដឹងដែលពិតជាចាំបាច់បំផុតសម្រាប់មនុស្សម្នាក់ៗ ខ្ញុំសុំការអនុញាតិសួរអ្នកផ្ទាល់ពីរសំនួរសិនគឺថា៖

១/ តើលោកអ្នកកំពុងបន្តជីវិតរស់នៅរាល់ថ្ងៃនេះដើម្បីអ្វី?

២/ តើអ្វីដែលលោកអ្នក ឬជីវិតរបស់លោកអ្នកត្រូវការពិតប្រាកដ?

នេះជាចំណេះដឹងធំៗទាំងពីរដែលមនុស្សគ្រប់គ្នាគួររៀននឹងឆ្លើយសំនួរជីវិតផ្ទាល់របស់លោកអ្នក៖

I.             ចំណេះដឹងដើម្បីបង្កើតសេរីភាពផ្នែកហិរញ្ញវត្ថុ

មនុស្សទាំងអស់គ្នាដែលនៅញាំបាយត្រូវចាយលុយ ឬមនុស្សដែលត្រូវការលុយទៅប្តូរយករបស់ញាំ គឺពួកគាត់នៅតែត្រូវការលុយ។

មនុស្សជាច្រើនដែលកំពុងបន្តរស់នៅរាល់ថ្ងៃនេះ គឺពិតជាត្រូវការលុយ តែអាចខុសគ្នាចំពោះចំនួនលុយប៉ុណ្ណោះ។ ហេតុអ្វីបានមនុស្សត្រូវការលុយ? ពីព្រោះថាមនុស្សក្នុងសង្គមយើង គឺបានចាប់ទុកលុយថាជារបស់ តំណាងសម្រាប់ប្តូររបស់មួយ។ ឧទាហរណ៍ថា ថ្ងៃនេះសមាជិកដ៏សំខាន់ក្នុងក្រុមគ្រួសាររបស់អ្នកម្នាក់មានជំងឺធ្ងន់ដែលពិតជាត្រូវតែការការសង្រ្គោះជាបន្ទាន់ ក្នុងការសង្គ្រោះហ្នឹងគឺត្រូវការចំណាយលុយ40,000,000រៀល។ អញ្ជឹងចំពោះការសង្គ្រោះហ្នឹងតើអ្នកអាចសុំពេទ្យថាកុំយកលុយអី តែសូមជួយសង្រ្គោះផងបានទេ។ ប្រហែលជាអាចបានម្តងឬពីរដងនោះ តែបើការសង្រ្គោះបែបហ្នឹងមានច្រើននាក់ឬច្រើនដង អញ្ជឹងតើលោកអ្នកពិតជាធ្វើដូចមុនហ្នឹងគ្រប់ដងបានទេ? ប្រាកដជាមិនអាចទេ។ បើមិនអាចទេត្រូវធ្វើដូចម្តេច? គឺត្រូវតែត្រូវការចាយឬចំណាយលុយ។

ព្រះបន្ទូលរបស់ព្រះពុទ្ធជាម្ខាស់បានពោលថា” មានកើត មានចាស់ មានឈឺ និងមានស្លាប់”

ខ្ញុំសូមធ្វើការសំរាយព្រះបន្ទូលរបស់ទ្រង់ត្រង់ចំនុចថា”មានឈឺ” មានឈឺនេះគឺមានន័យថាមនុស្សម្នាក់ៗត្រូវតែឈឺតែគ្រាន់តែធ្ងន់ឬស្រាលប៉ុណ្ណោះ តែមនុស្សត្រូវតែមានជំងឺ។

មនុស្សម្នាក់សុទ្ធតែត្រូវការញាំ អញ្ជឹងថាតើរបស់ដែលត្រូវការញាំពីមួយពេលទៅមួយពេលរបស់លោកអ្នកពិតជាមិនត្រូវការចំណាយលុយទេឬ? ពិតជាត្រូវការ។

បើពិតជាត្រូវការលុយមែន ថាតើយើងរកលុយឬបង្កើតលុយដោយរបៀបណា? 

មានវិធីយ៉ាងច្រើនក្នុងការរកលុយឬបង្កើតលុយ តែវិធីទាំងអស់នេះយើងអាចបង្រួមមកត្រឹមតែពីរយ៉ាង គឺរកឬបង្កើតលុយតាមបែបសកម្ម និងតាមបែបអកម្ម។

តើអ្វីទៅជាភាពខុសគ្នារបៀបការរកឬបង្កើតលុយតាមបែបសកម្ម និងតាមបែបអកម្ម?

- រកឬបង្កើតលុយតាមបែបសកម្ម គឺជាការរកឬបង្កើតលុយដែលចំាបាច់ត្រូវចំណាយពេលវេលានៃជីវិតរបស់លោកអ្នកទៅប្តូរយកលុយហ្នឹង។ ឧទាហរណ៍ៈ មនុស្សម្នាក់បានទៅធ្វើការក្នុងស្ថាប័នមួយក្នុងនាមជាបុគ្គលិក អញ្ជឹងគាត់ត្រូវតែទៅធ្វើការឲ្យស្ថាប័ននោះដើម្បីប្តូរយកលុយនៅចំនួនណាមួយដែលបានសន្យាគ្នានោះ។ គាត់ត្រូវចំណាយពេលវេលានៃជីវិតរបស់គាតន់អាចមួយថ្ងៃ8ម៉ោង ឬមួយអាទិត្យ48ម៉ោង ឬមួយខែ26ថ្ងៃ។

ពួកគាត់មានដូចជា បុគ្គលិក កម្មករ គ្រូបង្រៀន មន្រ្តី……… និងអ្នកបង្កើតអាជីវកម្មទាំងឡាយណាដែលជាថៅកែផងព្រមទាំងជាបុគ្គលិកដោយខ្លួនឯងផ្ទាល់។

មានន័យថាពួកគាត់ត្រូវតែធ្វើការ បើមិនធ្វើការទេគឺពួកគាត់ប្រាកដជាគ្មានចំណូលឬគ្មានលុយចូលផ្ទះឡើយ។

-រកឬបង្កើតលុយតាមបែបអកម្មគឺជាការរកឬបង្កើតលុយដោយមិនបាច់មានវត្តមានអ្នកទៅធ្វើជាសកម្មនោះទេ​ តែនៅតែមានចំណូលហូរចូលឬលុយហូរចួល។ ឧទាហរណ៍ដូចជាៈ អ្នកជាអាជីវករខ្នាតធំម្នាក់ ដែលមានអាជីវកម្មធំៗមួយចំនួន ហើយគាត់បានជួលមនុស្សឲ្យធ្វើការនៅក្នុងអាជីវកម្មរបស់អ្នកចាប់តាំងពីបុគ្គលិកលំដាប់ដំបូងរហូតដល់លំដាប់កំពូល មិនត្រឹមតែប៉ុណ្ណឹងទេ អាជីវកម្មរបស់អ្នកគឺបានមានប្រព័ន្ធបង្កើតលុយជាទៀងទាត់មួយឬលើសពីមួយដល់អ្នក ឬក៏អ្នកជាវិនិយោគិនដែលបានយកលុយទៅបង្កើតលុយដូចជាអ្នកមានដាក់លុយបញ្ញើក្នុងធនាគារដើម្បីទទូលបានការប្រាក់ ឬវិនិយោគជាមួយអចលនទ្រព្យ ផ្សារភាគហ៊ុន -ល-ដែលការវិនិយោគទាំងអស់នោះវាបានបង្កើតលុយឲ្យអ្នកដោយមិនបាច់មានវត្តមានអ្នកទៅធ្វើការនៅទីនោះឡើយ។

ភាពខុសគ្នាត្រង់ចំនុចនេះគឺថា ចំណូលសកម្មត្រូវតែពេលរបស់យើងទៅដូរយកលុយ ឯចំណូលអកម្មគឺជាការដែលយើងទទូលបានចំនូលដោយមិនបាច់មានវត្តមានយើងទៅធ្វើការក៏មានលុយ។
តើលោកអ្នកត្រូវការចំណូលមួយណា?  លោកអ្នកប្រាកដជាត្រូវការចំណូលអកម្ម។

អញ្ជឹងតើត្រូវធ្វើដូចម្តេចដើម្បីបង្កើតសេរីភាពផ្នែកហិរញ្ញវត្ថុបាន? ដើម្បីបង្កើតបង្កើតសេរីភាពផ្នែកហិរញ្ញវត្ថុបាន យើងគួរយល់និយមន័យនៃឃ្លានេះសិន។ សេរីភាពផ្នែកហិរញ្ញវត្ថុគឺជាចំណូលដែលបានមកពីចំណូលអកម្មរួមបញ្ជូលគ្នាហើយចំណូលអកម្មទាំងនេះគឺមានចំនូនធំជាងការចំណាយរបស់យើង។

តើចំណេះដឹងមួយណាដែលសំខាន់បំផុតក្នុងការសាងសេរីភាពផ្នែកហិរញ្ញវត្ថុ? ចំណេះដឹងដែលសំខាន់បំផុតក្នុងការសាងសេរីភាពផ្នែកហិរញ្ញវត្ថុ គឺជាចំណេះដឹងផ្នែកហិរញ្ញវត្ថុ។

តើចំណេះដឹងផ្នែកហិរញ្ញវត្ថុមានធាតុផ្សំអ្វីខ្លះ?

ចំណេះដឹងផ្នែកហិរញ្ញវត្ថុគឺមានធាតុផ្សំដូចជាៈ

- ប្រវត្តិប្រាក់

- យល់ដឹងពីរបាយការណ៍ហិរញ្ញវត្ថុរបស់អ្នក

- ស្គាល់ពីភាពខុសគ្នារវាងទ្រព្យ និងបំណុល

- ស្គាល់ពីភាពខុសគ្នារវាងកំណើនមូលធន និងលំហូរសាច់ប្រាក់

- ស្គាល់ពីភាពខុសគ្នារវាងការវិនិយោគបែបមូលដ្ឋាន និងបច្ចេកទេស

- ចេះវាស់ស្ទង់កម្លាំងរបស់ទ្រព្យ

- ចេះដឹងពីរបៀបជ្រើសរើសមនុស្សល្អ

- ដឹងថាទ្រព្យអ្វីដែលសមបំផុតសម្រាប់ខ្លួន

-  ដឹងថាពេលណាត្រូវយកចិត្តទុកដាក់ និងពេលវេលាត្រូវចម្រុះចោល

- ចេះកាត់បន្ថយហានិភ័យ

- ដឹងពីរបៀបកាត់បន្ថយពន្ធស្របច្បាប់

- ដឹងភាពខុសគ្នារវាងបំណុល ហើយនិងភាពជឿជាក់

- ចេះដឹងពីរបៀបប្រើការបម្លែងឬដេរីវេ( Derivative )

- ស្គាល់ពីរកត្តាដែលអាចបង្ករការលួចទ្រព្យសម្បត្តិរបស់អ្នកស្របច្បាប់

- ចេះរៀនពីកំហុស

លោកគ្រូសៀវ សុផលបានសង្ខេបបង្រួមសរុបមកត្រឹមបួនគឺៈ

-ចំណេះដឹងផ្នែកការវិនិយោគ

-ចំណេះដឹងផ្នែកច្បាប់

-ចំណេះដឹងផ្នែកទីផ្សារ

-ចំណេះដឹងផ្នែកគណនេយ្យ។

II.            ចំណេះដឹងក្នុងការសាងសុភមង្គលពិត

ភាពពិតក្នុងការរស់នៅរបស់មនុស្សគឺពិតជាចង់បានសេចក្តីសុខ ឬសុភមង្គលណាស់ តែគ្រាន់តែមនុស្សមួយចំនូនធំពុំបានដឹងថាត្រូវធ្វើយ៉ាងណាទើបទទូលបានវា។ ចំនុចនេះពិតជាចំនេះដឹងមួយដែលផ្តាតលើការអប់រំ លត់ដំ ហាត់ពត់ផ្លូវចិត្តរបស់យើង។

ចំណេះដឹងធំៗទាំងពីរដែលមនុស្សគ្រប់គ្នាគួររៀន

មានសាសនា ជំនឿ ព្រះបានបង្រៀនពីហេតុដែលនាំឲ្យគ្មានសេចក្តីសុខ និងហេតុនាំទៅរកក្តីសុខយ៉ាងច្បាស់ណាស់។ បើលោកអ្នកគោរពប្រតិបត្តិតាមព្រះពុទ្ធ  ព្រះគ្រឹស្ត អាល់ឡោះ ព្រះមហាម៉ាត់ ព្រះបប ព្រះបាហាអ៊ុលឡាហ៍ ឬព្រះអង្គដែលអ្នកពិតជាមានជំនឿនោះ អ្នកគួរសិក្សានិងប្រតិបត្តិតាមព្រះឱវាទរបស់ទ្រង់ ឬក៏អ្នកប្រាជ្ញរូបណាដែលពិតជាមានសេចក្តីសុខ ហើយអ្នកពិតជាចង់បានសេចក្តីប្រហាក់ប្រហែលនឹងសេចក្តីសុខដែលគាត់ទទួល អញ្ជឹងអ្នកគួរណាស់អនុវត្តតាមលំនាំទាំងនោះទៅ។​ តែបើអ្នកពិបាកក្នុងការយល់ពីព្រះបន្ទួលរបស់ទ្រង់ឬពិបាកក្នុងការសិក្សាតាមអ្នកប្រាជ្ញ អ្នកអាចសាងល្បងអនុវត្តនៅចំនុចទាំងនេះបាន៖

-រៀនពេញចិត្តអ្វីដែលខ្លួនមាន

-រៀនពេញចិត្តអ្វីដែលខ្លួនកំពុងធ្វើ ឬធ្វើអ្វីដែលខ្លួនពេញចិត្ត

-ញញឹម និងមានក្តីសង្ឃឹមជានិច្ចចំពោះអ្វីដែលខ្លួនពិតជាចង់បាន

-ព្យាយាមចែករំលែងសេចក្តីសុខដែលមានលក្ខណៈយូរអង្វែងដល់អ្នកជុំវិញ ឬអ្នកដទៃ

-ប្រកបអាជីព ឬអាជីវកម្មណាមួយដែលផ្តល់សេចក្តីសុខដល់ខ្លួនឯងនិងអ្នកដទៃក្នុងរយៈពេលយូរអង្វែង

-ប្រើជីវិតរស់នៅដោយផ្អែកលើគោលដៅ ក្តីសុបិន្ត និងបេសកកម្មជីវិតច្បាស់លាស់-ល-។

“ចូរបន្តដំណើរឆ្ពោះទៅកាន់អ្វីដែលលោកអ្នកពិតជាចង់បានឲ្យក្លាយជាទំលាប់ នោះវានឹងកាន់តែខិតមករកយើងដែរ”